All FriEndS
هل تريد التفاعل مع هذه المساهمة؟ كل ما عليك هو إنشاء حساب جديد ببضع خطوات أو تسجيل الدخول للمتابعة.
All FriEndS

أصدقاء للأبد
 
الرئيسيةأحدث الصورالتسجيلدخول

 

 علي اسم مصر لعمنا صلاح جاهين ... جاااامده

اذهب الى الأسفل 
2 مشترك
كاتب الموضوعرسالة
rere
مستشار ادارى
مستشار  ادارى
rere


عدد الرسائل : 737
الموقع : في اي قلب يحبني
تاريخ التسجيل : 03/04/2009

علي اسم مصر لعمنا صلاح جاهين  ... جاااامده Empty
مُساهمةموضوع: علي اسم مصر لعمنا صلاح جاهين ... جاااامده   علي اسم مصر لعمنا صلاح جاهين  ... جاااامده I_icon_minitimeالأربعاء أبريل 29, 2009 11:35 pm

اسم مصر

على اسم مصر التاريخ يقدر يقول ما شاء

أنا مصر عندي أحب وأجمل الأشياء

بحبها وهي مالكة الأرض شرق وغرب

وبحبها وهي مرمية جريحة حرب

بحبها بعنف وبرقة وعلى استحياء

واكرهها وألعن أبوها بعشق زي الداء

واسيبها واطفش في درب وتبقى هي ف درب

وتلتفت تلاقيني جنبها في الكرب

والنبض ينفض عروقي بألف نغمة وضرب

على اسم مصر

مصر النسيم في الليالي وبياعين الفل

ومرايه بهتانة ع القهوة .. أزورها .. واطل

القى النديم طل من مطرح منا طليت

والقاها برواز معلق عندنا في البيت

فيه القمر مصطفى كامل حبيب الكل

المصري باشا بشواربه اللي ما عرفوا الذل

ومصر فوق في الفراندة واسمها جولييت

ولما جيت بعد روميو بربع قرن بكيت

ومسحت دموعي في كمي ومن ساعتها وعيت

على اسم مصر

أنا اللي اسمي حتحـور .. أنا بنت رع

مثـال الأمـومـة ورمـز الحـنـان

تفـيض حـلمـاتي وتمـلا الـتـرع

وتسـقـي البـشـر كلهـم والغـيـطان

نهايته يا مصر اللي كانت أصبحت وخلاص

تمثال بديع وانفه في الطين غاص

وناس من البدو شدوا عليه حبال الخيش

والقرص رع العظيم بقى صاج خبيز للعيش

وساق محارب قديم مبتورة ف أبو قرقاص

ما تعرف اللي بترها سيف والا رصاص

والا الخراب اللي صاب عقل البلد بالطيش

قال ابن خلدون أمم متفسخة تعيش ليش

وحصان صهل صحى جميع الجيش

على اسم مصر


النخل في العالي والنيل ماشي طوالي

معكوسة فيه الصـور .. مقلوبة وانا مالي

يا ولاد أنا ف حالي زي النقش في العواميد

زي الهلال اللي فوق مدنة بنوها عبيد

وزي باقي العبيد باجري على عيالي

باجري وخطوي وئيد من تقل أحمالي

محنيه قامتي .. وهامتي كأن فيها حديد

وعينيا رمل العريش فيها وملح رشيد

لكني بافتحها زي اللي اتولدت من جديد


على اسم مصر

مصر .. التلات أحرف الساكنة اللي شاحنة ضجيج

زوم الهوا وطقش موج البحر لما يهيج

وعجيج حوافر خيول بتجر زغروطة

حزمة نغم صعب داخلة مسامعي مقروطة

في مسامي مضغوطه مع دمي لها تعاريج

ترع وقنوات سقت من جسمي كل نسيج

وجميع خيوط النسيج على نبرة مربوطة

أسمعها مهموسة والا أسمعها مشخوطة

شبكة رادار قلبي جوه ضلوعي مضبوطة

على اسم مصر

وترن من تاني نفس النبرة في وداني

ومؤشر الفرحة يتحرك في وجداني

وأغاني واحشاني باتذكرها ما لهاش عد

فيه شيء حصل أو بيحصل أو حيحصل جد

أو ربما الأمر حالة وجد واخداني

انا اللي ياما الهوى جابني ووداني

وكلام على لساني جاني لابد أقوله لحد

القمح ليه اسمه قمح اليوم وأمس وغد

ومصر يحرم عليها .. والجدال يشتد

على اسم مصر

لللشاعر الكبير عم الشعراء صلاح جاهين
الرجوع الى أعلى الصفحة اذهب الى الأسفل
MIDO
مدير تنفيذى
مدير تنفيذى
MIDO


عدد الرسائل : 509
تاريخ التسجيل : 03/04/2009

علي اسم مصر لعمنا صلاح جاهين  ... جاااامده Empty
مُساهمةموضوع: رد: علي اسم مصر لعمنا صلاح جاهين ... جاااامده   علي اسم مصر لعمنا صلاح جاهين  ... جاااامده I_icon_minitimeالخميس أبريل 30, 2009 3:06 am

شكرا لكى أختاااااااااه على موضوعاتك المتميزة دى


بجد دائما
مش عارف أقول ايه غير شكرا لحضرتك كثيراااااااااااااا

ميدو
أصدقاء للأبد
الرجوع الى أعلى الصفحة اذهب الى الأسفل
 
علي اسم مصر لعمنا صلاح جاهين ... جاااامده
الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
All FriEndS :: المنتدى الأدبى :: ركن النثر والخواطر-
انتقل الى: